БЕДИК ДЕҢНЕЛГЕ ЭРТКЕН.
Апрель 13-14 хүннеринде Чөөн-Хемчик кожууннуң чагырга даргазының шаңналы дээш республика чергелиг шыдыраа маргылдаазы бедик деңнелге эрткен. Маргылдаага киржири-биле 62 эр, 18 херээжен эң шыырак ойнакчылар чедип келгени - маргылдааны чидиг демисел болгаш белеткелдиг эрттирериниң магадылалы болган. Байырлыг ажыдыышкынга Чөөн-Хемчик кожууннуң чагырга даргазы Ондар Алага Николаевич киржип, байыр чедиргеш, чедиишкиннерни күзээн. Тыва Республиканың шыдыраа федерациязының даргазы Ооржак Ренат Чадамбаевич байыр чедирип, өөрүп четтиргениниң илередиин бижээн ажык чагааны чагырга даргазы Алага Николаевичиге база Чадаанада культура сайзырадыр төптүң директору Сат Чодураа Сергеевнага, хүндүлүг бижикти хоочун башкы Ховалыг Тимур Опал-ооловичиге тывыскан.
Чадаана хоорайның Баштыңы Начын Николаевич Монгуш киржикчилерге байыр чедиргеш, Чадаана хоорайның күш-культура болгаш спорттуң хоочуну» деп медальдарны республика маргылдааларының хөй дакпыр тиилкекчизи Сарыглар Орлан Владимировичиге, бо хүннерде 80 харлап турар Дуганчы Дайын-оол Константиновичиге, амгы үеде Кызылда чурттап чоруур шыдыраачы чаңгыс чер чурттуувус Монгуш Артур Дажыевичиге байырлыг байдалга тывыскан.
Шииткекчилер саавыр езугаар эр улус аразынга 9 салыгны, херээжен улус аразынга 7 салыгны ойнаарын дугурушканнар. Ынчангаш 2 хүн үргүлчүлээн маргылдааның түңнелинде херээжен ойнакчылар аразынга республиканың 6 дакпыр чемпиону Ондар Шуру Артышовна (Сүт-Хөл) чемпионнаан. Ийиги черни Кызылдан шыдыраачы Наксыл Долзат Сай-Дашовна чаалап алган. Чадаананның шыырак ойнакчызы, хоочуннар аразынга каш дакпыр тиилекчи Сат Айлаң Александровна аныяк шыдыраачылар аразынга чараш оюнну көргүзүп, үшкү черни ээлээн. Дөрттен, алдыгы шаңналдыг черлерни шыдыраачылар Бажың-Алаактан Домбу Саида Люндуповна, Кызыл кожуундан Эңге-Маадыр Кежикмаа Сергеевна, Чадаанадан Тюлюш Ада Ким-ооловна ээлээннер.
Херээжен хоочун ойнакчылар аразынга Чаа-Хөлдүң шыдыраачызы Кенден Алла Доржуевна шылгараан. Ийиги черни Теве-Хаяны төлээлээн шыдыраачы, башкы Светлана Сүге-Маадыровна Ондар, а үшкү черни Чаа-Хөлден Доржу Марина Солаан-ооловна ээлээннер. «Эң бичии ойнакчы» деп тускай шаңналга Кызылдан Чамурлиева Далида Орлановна төлептиг болган.
Эр улус аразынга чараш, катаптаттынмас күштерлиг оюн сөөлгү салыгларда безин көрүкчүлерниң болгаш ойнакчыларның сонуургалын улам хайныктырган. Тиилелгеже чүткүлүн көргүскен Өвүр-Чадаана дээш ойнап турар Доржу Эртине Тумат-оолович чемпионнап каан, ийиги черни Кунгуртугнуң төлээзи Манчин Экер-оол Маринович, а үшкү черни бистиң Чөөн-Хемчик кожуунндан, Чыраа-Бажы чурттуг шыдыраачы Монгуш Ужар Сорук-оолович ээлээннер. Дөртен, алдыгы шаңналдыг черлерниң эдилекчилери Чөөн-Хемчиктиң Хайыракандан Чүлдүм Артыш Андреевич, Кызылдан Куулар Адыгжы Алексеевич, Ийме-Улуг-Хемден Тюлюш Мөңгүн-оол Дарын-оолович олар болур. «Эң хоочун ойнакчы» деп тускай шаңналды Ондар Карбы Дөтпүровичиге, «Тиилелгеже чүткүл» деп шаңналды Чөөн-Хемчиктиң билдингир шыдыраачызы Сарыглар Орлан Владимировичиге тывыскан.
Маргылдааны түңнеп, байырлыг байдалга шаңналдарны тыпсып тура, кожууннуң чагырга даргазы Ондар Алага Николаевич, шыдыраа федерациязының оралакчы даргазы Манчын Экер-оол Маринович, хоочун шыдыраачы Анай-оол Мерген Кыргысович маргылдааның бедик деңнелге эрткенин, Чөөн-Хемчик кожуун Тывада хоочун, аныяк-даа шыдыраачыларны деткип, сайзырадып турар кожуун деп үнелээннер.
Тимур ХОВАЛЫГ, чуруктарны Алаш Сат болгаш Шуру Ондар тырттырып белеткээннер.
